Հայաստանի հաջորդ վարչապետ Սամվել Կարապետյանը կհասնի ուժեղ խաղաղության՝ բանակցելով ուժեղի դիրքերից, հիմնվելով իր միջազգային կապերի, խոշոր համակարգերի կառավարման բազմամյա փորձի, իր զինվորական ծառայության փորձի, ինչպես նաև տարիների ընթացքում զինվորներին, նրանց ընտանիքներին, վիրավորներին ցուցաբերած աջակցության ու Հայաստանի քաղաքացիների անվտանգության ամրապնդման գործում ունեցած մեծ ներդրման վրա։

Մեր անվտանգության ռազմավարությունը հիմնված է մի պարզ և հիմնարար սկզբունքի վրա․ ուժեղ և հաստատուն առաջնորդությունը կանխում է պատերազմը։ Մենք ներկայացնում ենք արդյունավետ կառավարման, խելացի սահմանների և բազմաշերտ պաշտպանական համակարգերի մոդել, որը թույլ կտա կանխել սպառնալիքները դեռ դրանց առաջացման նախնական փուլում։ Մեր նպատակը պարզ է՝ ապահովել անվտանգ և անկախ միջավայր, որտեղ մեր բանակը, դիվանագիտությունը և ռազմական արդյունաբերությունը միասին կաշխատեն ուժեղ խաղաղությունը պահպանելու համար։

10 000 դրոն և ԱԹՍ, պաշտպանական բյուջեի ավելացում։

Պաշտպանական բյուջեն կմեծացվի, որովհետև ազգային անվտանգությունը երբեք չի կարող երկրորդական լինել։

Հայաստանը կունենա հազարավոր տեղական արտադրության անօդաչու սարքեր, բազմաշերտ հակադրոնային պաշտպանություն, էլեկտրոնային պատերազմի համակարգեր և իրական ժամանակում աշխատող ռազմական կառավարման ու հետախուզական կենտրոններ։

«Ուժեղ խաղաղություն» ծրագրի շրջանակում կձևավորվի Հայաստանի բազմաշերտ ազգային հակաօդային պաշտպանության համակարգ՝ համադրելով ինչպես հարվածային, այնպես էլ ոչ հարվածային պաշտպանական միջոցները։ Կարճ, միջին և հեռահար պաշտպանության համակարգերը գործելու են միասնական՝ ոչնչացնելով սպառնալիքները մինչև Հայաստանի տարածք հասնելը։

Հայաստանի սահմանները խոցելի դիրքերից վերածվելու են ամբողջությամբ ամրացված, խելացի պաշտպանական գոտիների՝ հիմնված ժամանակակից տեխնոլոգիաների վրա։ Մշտական հետախուզական համակարգման կենտրոնները միավորելու են արբանյակային տվյալները, անօդաչու հետախուզությունը և արհեստական բանականության վերլուծությունը՝ բացահայտելով վտանգները դեռ մինչև լարվածության առաջացումը։

Կստեղծվի Ազգային կիբերանվտանգության ծառայություն, որը պաշտպանելու է Հայաստանի թվային ենթակառուցվածքները, կապի համակարգերը և ռազմավարական ցանցերը։

Զինվորական ծառայությունը պետք է դառնա հնարավորություն, արժանապատվություն և ազգային հպարտություն ձևավորող ճանապարհ։ Յուրաքանչյուր զինվոր կստանա երաշխավորված ծառայության վարձատրություն՝ կապված երկրի նվազագույն աշխատավարձի հետ, որպեսզի ոչ մի հայ զինվոր հայրենիքը պաշտպանելիս չհայտնվի սոցիալական դժվարությունների մեջ

Ծառայությունն ավարտելուց հետո զինվորները հնարավորություն կունենան ստանալ պետության կողմից ֆինանսավորվող բարձրագույն կրթություն Հայաստանի բուհերում կամ օգտվել անվճար մասնագիտական և տեխնոլոգիական կրթական ծրագրերից, որոնք կօգնեն կառուցել կայուն ապագա։

Մեր վետերանները կունենան երկարաժամկետ բժշկական և հոգեբանական աջակցություն, արտոնյալ բնակարանային ծրագրեր և աշխատանքի առաջնահերթ հնարավորություններ պետական ծառայության տարբեր ոլորտներում։ Հայրենիքին ծառայելը պետք է նոր դռներ բացի երիտասարդի առաջ, ոչ թե հետաձգի նրա կյանքը։

Հայաստանը պետք է ստեղծի իր ժամանակակից պաշտպանական արդյունաբերությունը՝ կարողանալով երկրում արտադրել անօդաչու սարքեր, էլեկտրոնային համակարգեր, օպտիկական սարքավորումներ, զինամթերք և առաջադեմ ռազմական տեխնոլոգիաներ։ Այն պետությունը, որն ինքն է ստեղծում իր պաշտպանությունը, ինքն է վերահսկում իր ապագան։

Սամվել Կարապետյանը Հայաստան կբերի միջազգային գործընկերների և առաջատար տեխնոլոգիական ընկերությունների ներդրումներ՝ համատեղ արտադրությունների և տեխնոլոգիական փոխանցման ծրագրերի միջոցով։ Սա ոչ միայն կուժեղացնի Հայաստանի ազգային անվտանգությունը, այլև կստեղծի հազարավոր աշխատատեղեր բարձր տեխնոլոգիական ոլորտում։