Քաղաքական կոմպասը առաջին հայալեզու գործիքն է, որը քաղաքացիներին տեղակայում է քաղաքական առանցքի վրա: Կոմպասի hարցաշարը բաղկացած է հասարակական, քաղաքական, տնտեսական և սոցիալ-մշակութային ոլորտներին վերաբերող 43 հարցերից: «Քաղաքական երկխոսության» ՏՏ թիմի կողմից մշակված խելացի ալգորիթմի միջոցով ծրագիրը օգտատերերին տեղակայում է քաղաքական կոորդինատային առանցքի վրա՝ ցույց տալով իրենց մոտավոր դիրքը քաղաքական - գաղափարական տարապատկերում: Կոմպասի կոորդինատային առանցքի վրա ներկայացված են հայաստանյան մի շարք կուսակցություններ, որոնց տեղակայումը կատարվել է ըստ վերջիններիս ծրագրերում արտահայտված գաղափարախոսությունների։ Այսպիսով, Քաղաքական Կոմպասն օգնում է բացահայտել, թե որ քաղաքական կուսակցության գաղափարախոսությունն է մոտ քաղաքացիների հայացքներին։ Կոմպասը հասանելի է հայերեն և անգլերեն լեզուներով։ Հազարավոր քաղաքացիներ արդեն իսկ հասցրել են անցնել հարցաշարը և տեղեկանալ իրենց քաղաքական գաղափարախոսության մասին։

Կարևորելով երկխոսությունը քաղաքական ուժերի և քաղաքացիական հասարակության միջև՝ որպես հարատև ժողովրդավարության հասնելու ճանապարհին առանցքային հանգրվան ստեղծել ենք քաղաքական երկխոսության հարթակ՝ նպատակ ունենալով կոտրել նրանց միջև եղած անջրպետը։ Ի վերջո, ժողովրդավարությունն սկսում է երկխոսությամբ։ Երկխոսության հարթակի շրջանակներում կազմակերպվել և շարունակվում են կազմակերպվել քննարկումներ տարբեր թեմաների շուրջ, ինչպես օրինակ աշխատանքային իրավունքներ, դատաիրավական բարեփոխումներ, Արցախյան հիմնահարց, մեդիառեֆորմներ և այլն։ Քննարկումների մասնակիցներն ու բանախոսներն են խորհրդարանական և արտախորհրդարանական կուսակցությունների անդամները, քաղաքացիական հասարակության և փորձագիտական համայնքի ներկայացուցիչները։ Քննարկումները անցկացվում են ինչպես փակ ֆորմատով, այնպես էլ հանրային մասնակցությամբ։

Այս բաժնում կարող եք ծանոթանալ քաղաքական ուժերի 2026թ. նախընտրական ծրագրային դրույթներին՝ ըստ բաժինների, ինչպես նաև համեմատել դրանք: *Ներառված են այն ուժերի ծրագրերը, որոնք հանրայնացրել կամ տրամադրել են իրենց ծրագրերը մինչև մայիսի 7-ը։

Ծրագրի նպատակն է ինֆոգրաֆիկաների միջոցով քաղաքական գործընթացները ավելի հասանելի դարձնել հասարակության լայն շերտերին և քաղաքականությունը ավելի մոտեցնել քաղաքացիներին: Ինֆոգրաֆիկաները քաղաքական գործընթացները, օրենքների նախագծերը, կառավարության որոշումները ներկայացնում են հանրամատչելի եղանակով։ Վերջիններիս նպատակը ոչ միայն քաղաքական տեղեկատվությունը հասկանալի դարձնելն է, այլև հանրության ուշադրությունը գրավելը և քաղաքական գործընթացներում ներգրավելը։

Կազմակերպությունը նախաձեռնում և պատրաստում է տարբեր հետազոտություններ։ Հետազոտություններն անդրադառնում են մի շարք թեմաների, ինչպիսիք են կուսակցությունները, քաղաքական գաղափարախոսությունները, քաղաքակամ ուժերի նախընտրական ծրագրերը, քաղաքական դիսկուրսը և այլն։ Հետազոտությունների արդյունքները վիզուալիզացիայի գործիքների շնորհիվ ներկայացվում են քաղաքացիներին։ Այսպիսով, հետազոտությունը հասանելի է դառնում ոչ միայն քաղաքացիական հասարակության և փորձագիտական համայնքի համար, այլև հանրության լայն շերտերին։

Կազմակերպությունը իրականացնում է «Քաղաքական Փոդքաստների» շարք։ Հաշվի առնելով այն հանգամանքը, որ պետական հաստատությունների ու լրատվամիջոցների՝ քաղաքական գործընթացների և բարեփոխումների մասին տրամադրած տեղեկատվությունը դժվար հասկանալի է, իսկ հաղորդակցությունը բարդ և ոչ գրավիչ՝ կազմակերպությունը փորձում է լրացնել այս բացը փոդքասթների միջոցով։ Փոդքաստների բանախոսները՝ քաղհասարակության և փորձագիտական համայնքի ներկայացուցիչները, զրույցի ձևաչափով ներկայացնում են ինչպես հանրային հետաքրքրություն ներկայացնող քաղաքական թեմաները, այնպես էլ կարևոր նշանակություն ունեցող, բայց հանրային օրակարգում չընդգրված հարցերը։