Բռնության հրապարակային կոչ և քարոզ

Բռնության հրապարակային կոչ և քարոզ անողներին սպառնում է կալանք և ազատազրկում

2020թ․ ապրիլի 15-ին ՀՀ ազգային ժողովը երկրորդ ընթերցմամբ և ամբողջությամբ ընդունեց կառավարության կողմից ներկայացված օրենքի նախագիծը, որով առաջարկվում էր բռնության հրապարկային կոչը և քարոզը քրեականացնել:

ՀՀ քրեական օրենսգրքում լրացում կատարելու մասին և Հայաստանի Հանրապետության քրեական դատավարության օրենսգրքում լրացում կատարելու մասին օրենքների նախագծերի փաթեթին կողմ է քվեարկել 97 պատգամավոր,  14-ը՝ դեմ, ձեռնպահներ չեն եղել։

Նշենք, որ Ազգային ժողովը առաջին ընթերցմամբ Քրեական օրենսգրքում և ՀՀ Քրեական դատավարության օրենսգրքում լրացում կատարելու վերաբերյալ կառավարության ներկայացրած օրենքի նախագծերը ընդունել էր 2020թ․ մարտի 6-ին, որի ժամանակ նախագծին կողմ քվեարկեց  91 պատգամավոր, դեմ՝ 0, ձեռնպահ՝ 21:

Օրինագիծը վերաբերում է անձի կամ անձանց խմբի նկատմամբ անձնական կամ սոցիալական բնույթի հանգամանքներով պայմանավորված բռնություն գործադրելու հրապարակային կոչերին, նման բռնությունը հրապարակային արդարացնելուն կամ քարոզելուն։

Ի՞նչ է բռնության կոչը

Բռնության կոչը անձի կամ անձանց խմբերի գիտակցության վրա ունեցած ազդեցությունն է, որը վերջիններիս կարող է մղել այլ անձանց նկատմամբ բռնություն կիրառելուն։

Ի՞նչ է բռնության քարոզը

Բռնության քարոզը անձի կամ անձանց խմբերի նկատմամբ բռնություն գործադրելուն ուղղված գաղափարների տարածումն է: 

Ի դեպ

Հանցակազմի առկայության համար և՛ բռնության կոչը և՛ քարոզը պետք է լինեն հրապարակային, իսկ վարույթ իրականացնող մարմինը պետք է ուսումնասիրի, թե ինչպիսի՞ն է դրանց ազդեցության աստիճանը անձի կամ հանրության վրա, ստուգի իրական վտանգի առկայությունը և այլն։

Աշխարհն ու բռնության կոչերը

Ամբողջ աշխարհում բռնության կոչերն ու քարոզը կարգավորող չափանիշները տարբեր են, սակայն յուրաքանչյուր պետություն փորձում է ներդնել այնպիսի մեխանիզմներ, որոնք նվազագույնի կհասցնեն նմանատիպ կոչերն ու դրանց ազդեցությունը։

Բռնության կոչերի ու ատելության խոսքի արդյունքում տեղի ունեցած ողբերգության ամենավառ օրինակներից է 1994 թ. թութսիների էթնիկ խմբերի ցեղասպանության հիմքերի նախապատրաստումն ու Ռուանդայի ռադիոալիքի՝ Thousand Hills Free Radio and Television, RTLMC-ի կողմից հնչող բռնության ուղղակի կոչերը, որի արդյունքում զոհվեց ավելի քան 800 հազար մարդ: 

Ո՛չ բռնությանը