Սահմանադրական փոփոխություն

ԱԺ «Իմ քայլը» խմբակցության մի խումբ պատգամավորներ սահմանադրության փոփոխության նախագիծ են ներկայացրել Ազգային ժողով։

 

Փոփոխություններ են նախատեսվում ՍԴ նախագահին և անդամներին վերաբերող դրույթներում։ Նախագծով առաջարկվում է սահմանադրության 213-րդ հոդվածը շարադրել նոր խմբագրությամբ՝ «մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է»: 

Հարկ է նշել, որ  Սահմանադրության 7-րդ գլխի ուժի մեջ մտնելուց հետո ՍԴ դատավոր են ընտրվել միայն Վահե Գրիգորյանը և Արմեն Դիլանյանը։

 

Սա նշանակում է, որ նախագծի ընդունման դեպքում՝ դադարում են ոչ միայն  ՍԴ նախագահ Հրայր Թովմասյանի լիազորությունները, այլև մյուս ՍԴ անդամներինը ևս։ 

ՍԴ դատավորներ Վահե Գրիգորյանը և Արմեն Դիլանյանը կշարունակեն պաշտոնավերել։

 

Ըստ նախագծի՝ Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Կառավարությունը, Հանրապետության նախագահը եւ դատավորների ընդհանուր ժողովը։

 

Ըստ սահմանադրության 202-րդ հոդվածի՝ ԱԺ պատգամավորների ընդհանուր թվի առնավազն մեկ երրորդ ունի սահմանադրական փոփոխություններ նախաձեռնելու իրավասություն, իսկ նախաձեռնված փոփոխությունների ընդունման համար պահանջվում է պատգամավորների ընդհանուր թվի առնվազն երկու երրորդը: 

 

Հ․Գ․ Փետրվարի 6-ի ԱԺ արտահերթ նիստում Սահմանադրության փոփոխության նախագծի համահեղինակ Վահագն Հովակիմյանը իր ելույթում հայտարարեց, որ «Իմ քայլը» խմբակցությունը առաջին ընթերցմամբ կտապալի նախագծի ընդունումը և այն կներկայացվի համաժողովրդական հանրաքվեի: